一般嘅分體機對於香港家庭嚟講比較大嘅缺點就係室外機安裝同維護比較麻煩，而且成本較高。喺呢種情況下，一種比較特殊嘅分體式冷氣機就應市場需求誕生咗，佢就係纖巧型分體式冷氣機。

由於一路以嚟香港家庭都係使用窗口式冷氣機為主，所以早期大多數樓宇興建時都會順勢喺外牆起一個石屎台，方便未來屋主安裝窗口式冷氣機。

不過隨住香港人嘅生活水平慢慢提升，使用體驗更好嘅分體式冷氣變成香港市民嘅優先考慮，但係又由於香港大廈結構特點導致安裝分體機室外機嘅工序麻煩，成本較高，間接提高咗購買分體式冷氣嘅門檻。呢個時候，纖巧型冷氣機就可以解決呢個問題。市面上嘅纖巧型冷氣機室外機高度通常係低於430mm，啱啱好可以放喺大多數香港樓宇外牆嘅石屎台度，節省空間同埋各方面成本，相對應嘅，纖巧型分體式比起普通分體機嘅價錢亦會貴一啲。