今日繼續同大家分享2021年裝修攻略，上次就介紹咗木門同厨房嘅檯面石點樣揀嘅小貼士，今日精英師傅就帶大家睇下其他裝修物料有咩要注意嘅。
先同大家講下磁磚，磁磚要注意既嘢有好多，之前我哋都講過唔少關於磁磚嘅知識，但空心磚問題係最近大家比較關心嘅事情，畢竟好容易中伏。空心磚嘅成因有以下三點：
● 一係因為防水料造得太厚；
● 二係瓷砖條罅留得太窄；
● 三亦係最常見既原因——磁磚冇浸水。
如果地磚係木紋磚，密度高唔駛浸，但牆磚就要多數要浸。點知要唔要瓷磚浸水，你浸落水睇下有冇泡出，有就即係要。飲唔飽水就鋪就會出現空心磚。你將牆身磚同木紋地磚放入水就會見到分別，真係唔肯定就要買嘅時候就問清楚。
講到地下，咁就介紹埋地板。首先要講下無縫地板。嚴格嚟講，無縫地板唔係一種地板嘅統稱，因為無縫地板唔係一種物料，只係代表佢係用扣榫方式安裝。膠地板無縫地板同木地板無縫地板性質係好唔同，木地板又分為木纖維地板(laminate)同實木複合地板(engineered wood)，兩者無論喺安裝定係特性上係完全唔同，所以好多地方講無縫地板，好容易會令人混淆。
木纖維地板同實木復合地板各有特色，木纖維地板面層係木紋印刷色紙，內層係由木碎（MDF高密度纖維板）壓成，而實木復合地板面層係實木，下面係由唔同成熟嘅夾板夾成。
如果唔想用磚鋪地，可以比較膠地板、石塑地板（英文名叫SPC地板）同埋纖維地板呢三種。如果講最值得大家留意嘅，一定係SPC 地板，因為佢完全防水，唔怕受潮。新加坡同香港氣候相近，多數人都係用SPC地板，好少用纖維地板。
講到傢俬物料，好多人問點揀好，例如問夾板好定纖維板好。其實門板要輕、否則五金負荷重，背板要高密度、否則五金唔爛但背板爛，個櫃都係會塌。咁你話應該用夾板定纖維板？呢啲細節一般係傢俬廠同埋裝修公司按櫃既結構需要去調整。如果裝修公司問番你用咩料，你應該叫佢俾意見先，如果唔系一陣開咗工先問你點樣揀，就會好被動又影響進度同效率。因為一個出色嘅裝修師傅係應該識得俾建議客人，而唔係每次都問番客人，否則搵裝修師傅嘅價值就唔存在啦。
傢俬嘅面料，即係焗漆、膠板、木板呢三種係我哋經常要揀嘅。最值得大家了解嘅就係膠板，又叫防火板，市面上有西德板防火板、formica防火板、德利板防火板呢幾種。防火板容易清潔、抗壓抗刮都強，所以造地台都係用防火膠板多。但防火板有個明顯嘅弊端，係防火板邊嘅碰口位有黑邊，要戶主要識得主動同公司講要用封邊條封邊，否則大部分裝修公司唔會主動幫你封。另外，地台床邊係封唔到嘅，因為防火板嘅封邊條有闊度限制。西德板最闊都係兩三尺左右。如果要做到見唔到黑邊，設計時就要非常講究。
大家都知道靚嘅傢私好要訂造，比如做書枱、做鞋櫃，做書架呢D，但地台床呢？，床嘅尺寸係標準架，當然唔需要訂造啦、用現成或者用積木地台床，壽命長一倍，成本低一半唔止。訂造傢私嘅話，做書枱要承重、做鞋櫃唔駛；做廚櫃廁櫃要受潮。
室內裝修要注意嘅問題當然唔止呢啲啦，下個部分會繼續同大家繼續介紹其他防中伏知識，大家記得留意下篇文章，如果大家覺得精英師傅嘅推薦有用，又想了解更多關於裝修嘅問題，可以通過WhatsApp 6628 4865同我哋交流。
